Micron Chips近期受到玩家追捧，所以貧僧都返左批Crucial Ballistix D4-3200 睇吓門口，規格係 CL 16-18-18-36 @1.35V，紅色散熱器、無光害，16GB Kit (8GBx2)賣街 HK$735、32GB Kit (16GBx2) 賣HK$1,390，建達代理貨，好唔好超就真係唔 Q 知啦。

有信眾報料話新高登 1 樓有張賣 HK$2,980 嘅 GALAX RTX 2070 Super 卡出現，貧僧即刻八卦點知真有其事，立即買走張番來睇，老闆唔畀單、即場試、仲要無保，問佢就話係水貨喎，大佬你呢口價我連 2060 Super 都未番到貨呀。

唔識超級花花唔重要 ? 事實上你可能都用緊花花牛，只不過貼住其他牌子你唔知啫， 貧僧翻左 LEADEXIII ARGB 80Plus 金牛全模組，白色外殼、ARGB 風扇再加發光 iCable 接頭，係咪好靚仔呢。施主想問幾錢 ? 賣街 650W $1,089、750W $1,169、850W $1,289，唉...講錢就傷感情啦 🙏。

「武漢肺炎」陰霾下，好多行業都用個「慘」字形容，咁腦場又會點呢 ? 貧僧收集咗腦場幾間 C 開頭大舖嘅數據，發現 3 月 GP 條數勁到仆街，較去年「反送中」時期升左接近 1 倍，去番 17 年嘅水平。主要原因係受惠於「打機抗疫」，仲要偏向買中高階野喎，砌機砌到你手軟啊，但呢個勢可以維持幾耐，主要視乎貨源問題能否解「缺」，否則你想賣都無貨賣，貧僧要收舖啦，完。

貧僧係今日化化吓緣，見到成地都係Phanteks 機箱，咁就八掛問下代理哥哥，今水有冇新野啦! 佢話新到左隻 P300A MESH EDITION，早前 P300賣得唔錯，啱晒香港地呢D咁L大嘅空間，今次改埋MESH 網面版本，散熱更加精神啦，不過來貨成本貴左，賣街要 HK$540。