P記一拖三變頻分體機重生篇

dcc2000

4月尾屋企人嗰部P記一拖三分體機有一晚無啦啦突然死亡, 3部掛機嘅TIMER燈長閃, 試咗熄大制斷電、撳遙控或掛機嘅reset制, 重開機後故障依舊。
用遙控check error code 為 F90, 室外機嘅自檢LED亦顯示為F90, 指PFC電路故障, 原因可以係室外機主板甚至Compressor壞。

當年裝修時, 因有雪種喉入咗傢俬及假天花, 要重新拉喉, 家具好難無損, 或多或少都要執手尾, 用返舊喉又唔太理想, 原本打算嚟緊一、兩年會大裝修, 若依家裝新機, 到時又要就位或移機, 所以傾向寧愿維修。

dcc2000

揾P記代理信X, 檢查費980, 仲要等一、兩星期, 之後轉折揾到位師傅, 佢話信X仍有零件可提供, 報到大概維修價格, 換主板、濾波板、壓縮機、維修人工等等各項價格, 屋企人最終搭咗棚, 師傅拆開檢查後有講過部機比較舊(用咗13年), 要維修當然可以, 報咗個總維修價, 但值唔值得整就自行考慮。

最終, 當然(省卻千字), 無奈之下要選擇換機, 因位置所限, 只能裝返一拖三, 機 + 裝工, 預計至少兩萬七、八。

dcc2000

其實部機一直正正常常用緊, 個死亡跡象似係電路(電子零件)問題, 雖然師傅有講過壓縮機三組線圈阻值低於官方spec, 可能導至主板損壞。

喺揀新機其間, 部舊機反正擺喺度, 為何唔做吓科研？

首先search吓淘佬有無主板, 完全一樣嘅就預咗冇喇, 外觀相當近似嘅(一拖四)型號就有, 但PCB形狀及螺絲位亦有分別, 賣家話用唔到。

dcc2000

喺外國揾到拆機主板, 運費仲貴過三塊板, 總計要成兩千幾蚊。

都係拆開睇吓先, 安裝嘅位置確係刁鑽, 感謝之前嘅師傅將最難拆嘅螺絲擰鬆咗。

部機嘅狀況, 銅管當然有氧化, 畢竟十幾年機, 同時發現當年師傅並無搣開底盘去水口鐵片, 及做去水(淨冷機好多師傅唔做), 因銅管嘅倒汗水會被導入機壳底部, 若冇開去水口, 即係養水喺鋅鐵底盘, 導至生銹係必然, 情況類似冇做去水嘅窗口機。




先檢查壓縮機, 3組線圈阻值均為0.9Ω, 未知是否符合官方規格, 對地無短路, 有冇內傷就唔知了。
檢查幾粒sensor阻值, 基本符合官方規格。






若要將整個模块(主板及濾波板)拆下都幾大工程, 要甩晒旁邊主供電、及3部掛機嘅電源線, 唯有偷雞只拆機頂主板, 主板與黑色膠框有封膠, 拆走6粒螺絲後, 用cutter界開主板與膠框位置嘅封膠, 取出主板。

dcc2000

主板零件冇明顯燒毀痕跡, 初步檢查發現PFC電路嘅IGBT管燒毀(E、C短路), 而兩隻橋式整流器, 及IPM模块(推壓縮機)均正常, 若壓縮機有問題, IPM通常會燒埋, 鬆5粒螺絲拆下散熱器就見到以上4個零件, 導熱膏似乎都乾硬化了。
拆下GT30J122 IGBT, 確定E、C短路, 再測其它位置電路有無異常, 特別係6粒連接IPM模块嘅680Ω電阻, 及IGBT嘅電路(Zener、三極管、光耦、電阻、電容)。







部機仍能出到error code, 理論上CPU控制電路, 及低壓供電係正常, 更換IGBT後, 及重新塗上導熱膏, 裝好散熱器, 封返螺絲位, 接220V測試, 因為冇接主要組件, 所以只能check到最基本嘅低壓供電是否正常。

dcc2000

搏一搏, 單車變摩托, 裝返落室外機, 開大制, 按遙控開機, 壓縮機及風扇正常啟動, 室外機嘅自檢LED亦顯示正常, 室內掛機亦可用遙控清除F90 error code。




熄大制, 主板噴返保護漆, 等幾個鐘乾固後再開機, 一切正常。




飽歷十多年日晒雨淋嘅豬腸喉已老化開裂, 劏幾條豬腸喉暫時紮住頂檔, 試吓長Run兩三日部機有冇問題。
3芯電線再加一條, 以前裝機師傅嘅手工, 自行評價。

dcc2000

Run咗幾日冇問題, 淘埋其它材料, 開口自粘豬腸喉, PVC紮帶, 鋁箔膠紙, EVA膠水, 索帶, 喉馬等進行修補。




洗機, 拆舊豬腸喉, 整理電源線, 裝不銹鋼去水盤, 套上新豬腸喉, 每條喉接駁位用膠水及鋁箔膠紙封好, 先包一層PVC紮帶, 之後連埋電線一齊再包一層, 再油SIKA防水油(係其它地方用剩的), DIY級別, 手工麻麻, 部機捱到幾耐得幾耐, 嚮應環保。














順便買咗隻玩具。




淘豬腸喉時然發現呢種室外機 “隔塵網”, 若室外機位置手可觸及, 可以試試, 畢竟一般用家要洗室外機比較困難(排走污水)。

dcc2000

順手整埋兩隻黑屏遙控(換偏光底膜)
更換時要試角度, 我呢張銀面白底需要左轉45°

ricoyoki

無功底做唔到, 佩服.

1qwer

多謝師兄分享。