買咗LG 34GP950G ，成皮野，後悔不已，不幸事件！

本帖最後由 hihi307 於 2022-1-20 23:38 編輯

我係9月中買咗個34吋 LG 34GP950G，行貨，＄11,990。直到11月1號，個Mon 突然之間熄咗，冇畫面，開關制只著紅燈，之後一直開唔著。一般正常上網，冇打機，只係用咗個半月。旗艦Mon？

11月2號，打去LG維修中心，電話一直冇人接，淨係錄音，留咗個電話號碼話可以whatsapp。留低咗msg 之後，終於有電話回覆話可安排師傅上門睇吓。我要求借mon暫用，但職員話要師傅證明真係壞咗先。(心諗你都有病，如果唔係壞我就唔使打電話俾你啦，算，費事同你坳）

等咗4日，11月6號，專登請半日假等師傅上黎，師傅用佢帶黎嘅火牛試，用咗幾分鐘，證實著唔到Mon，而我就咁冇咗半日假。

又等4日，11月10日，安排師傳上門換零件，折開部機，嘗試更換底板，（折過程用暴力撬開，整花咗個殼，個半月新mon呀，大哥！）但係換完個mon仍然着唔到。師傅折返零件出嚟還原。話又要再訂CPU嘗試更換，（無錯，個mon入邊仲有粒u，點解你哋師傅唔係一次過呢，要分開換！我又要請假等你），話要再次安排到我屋企更換。我當然要求客戶服務部主任回覆，但冇人覆我！

*****期間我再次要求借MON，客服仍然話冇咁嘅服務，並且今次回覆已經訂CPU，叫我耐心等待******

又等5日，11月15日，師傳上門，再次折開部機，今次更換CPU，(再次撬開），同樣換完u個mon仍然着唔到。師傅又一次折返零件出嚟還原。

我已經開始火滾，冇可能不斷畀你哋係咁試，我亦冇可能不斷放假等你上門一次又一次更換零件。

師傅亦都話，下次再嘗試換其他零件，亦不能保證成功，可能要一直試，唔知換那一零件才能成功。

唔好再浪費我時間，要求直接換機！我繼續打電話要求客戶服務部主任回覆，但仍然冇人覆我！只係靠whatsapp，msg 答應我換機要求。但呢個只係另一個惡夢開始.....

客戶服務中心whatsapp只答而家冇貨，唔知要等幾耐，一直叫我諒解同耐心等待。畀個期我呀!! 等10年？20年？直到我發火話要投訴消委會，終於係11月18號話12月底有貨。

期間一直要求職員電話回覆，但一直冇電話回覆，直到12月30日，whatsapp 再追問之下，竟然答:

"您好，十分抱歉，我們正在幫閣下催促當中，請耐心等待，造成不便，請原諒。"

呢個message，大大話話copy and paste俾我數十次，我已經成個月完全用唔到電腦！

喺呢度，提醒想買LG嘅朋友，LG旗艦Mon喎?! 品質唔好講啦，淨係講售後服務，真係差到一個點，以後唔再買LG 機啦, 奉勸大家借此為鑒！
2 (15).jpg

***************************************************************************
今日(3/1) 再次打去客務中心, 強烈投訴之下, 終於有個主任call back我.

追問之下, 竟然答我要再等一月尾先可能有貨?! 之前回覆我12月尾有, 我唔打去問都唔覆我, 仲要話唔肯定到時係咪一定有貨返, 我即刻著咗, 咁你之前覆我12月尾有貨, 求其吹 ?? 到時冇咁點呀?? 又再等?? 等幾耐呀??!! CLS公司, 咁大間公司, 啲貨期可以咁唔肯定? 簡直同黑店無分別 !!

已經投訴消委會, 做好心理準備, 皮幾嘢當買個教訓!!

LG 永不錄用!!!!!

*****************************************************************************

今日LG 終於換咗個新mon畀我, 折騰咗兩個月, 終於告一段落, 希望個mon健健康康,

大家以後買mon, 以此為鑑。