hk133

Rank: 3 Rank: 3 Rank: 3

1^# 跳轉到 » 倒序看帖

打印

字體大小: tT

發表於 2019-5-18 03:30 | 只看該作者

[開箱] 魅族Hi-Fi解碼耳放開箱測評

本帖最後由 hk133 於 2019-5-18 03:55 編輯

格式工廠cover.jpg

睇到topic個名，應該會有啲不明真相嘅人以為魅族真係重返HiFi領域，出返部解碼耳放，其實只係一條Type C耳機轉接線......
不過呢條轉接線用嘅DAC chip係CS43131，Plenue D2同款。
而且支持32bit/384kHz PCM解碼輸出，好過最高支持48kHz解碼嘅HTC線同埋apple線。
仲內置兩粒獨立LDO低壓差線性穩壓器，實現模擬/數字分離式供電設計，理論上可以隔離信號干擾，仲有專用濾波電路降低底噪以及失真。
不過重點應該係佢嘅售價，169人仔。
手機廠，或者應該話消費類電子產品廠商會出內置DAC嘅Type-C耳機轉接線都唔係咩新鮮事，不過會sell Hi-Fi音質，仲要賣到百幾蚊人仔嘅價錢就真係第一次見。（x為用43130嗰條線都賣到599人仔）
於是我趁佢第一日開賣就走去淘佬買，點知秒速缺貨。

然後過咗一陣，突然有唔少淘佬商家都上架魅族HiFi解碼耳放嘅預售link，居然唔使加價都賣到，咁就梗係落單啦。
等咗兩個星期之後，賣家終於發貨，一日時間就到咗集運倉，落單集運之後第二日就到咗自提點，終於到手。
講咗咁多，都係時候俾大家睇下開箱啦。

包裝盒正面左上方係魅族logo，中間印有產品圖片。
底部中英雙語寫明係“魅族HiFi解碼耳放”。（命名上贏咗其他轉接線

）
由圖片可見，魅族呢條轉接線插頭端有透視窗開孔，似乎可以睇到內部嘅芯片。

格式工廠IMG_1528~1.jpg

包裝背面上方標示咗產品嘅特點：
高性能DAC芯片，純淨HiFi音質，600Ω高阻抗推力（我覺得呢個係吹水

），精巧便攜設計。
到底有幾多點係信得過？一陣試過就知。
下方有標示產品規格，有幾個項目好似都係標示返DAC嘅參數？

格式工廠IMG_1531.jpg

打開個盒之後，最先見到嘅唔係作為主角嘅轉接線，而係說明書。
不過轉接線插落手機/加個轉接頭插落電腦就用得，說明書可以無視。

格式工廠IMG_1533.jpg

攞走本說明書之後終於見到轉接線本體。
同包裝盒上嘅圖片一樣，轉接線插頭端有透視窗一側向外展示。
好似暫時得魅族會喺轉接線玩透視窗設計，俾人睇到內部芯片？

格式工廠IMG_1536.jpg

攞條線出嚟嗰時順便睇真啲，原來插頭端同耳機插口都係用金屬外殼。
遠睇真係唔多覺，加埋佢地都冇宣傳過係用金屬外殼，係攞上手睇真啲、摸真啲先知道係金屬殼。
呢個金屬殼做工好過我嗰條Tempotec Sonata HD，不愧係手機廠出品。

雖然有懷疑過魅族HiFi解碼線上面嘅透視窗有可能只係好似x米探索版咁樣，係浮雕貼紙扮透視，但考慮到呢條轉接線內部空間唔大，而且呢個結構都幾難放得落浮雕貼紙，由透視窗睇到嘅芯片都似係真實嘅芯片電路，所以呢個透視窗係真正睇到內部結構嘅可能係好大。
不過其他廠都會幫轉接線嘅芯片電路加返個金屬屏蔽罩，魅族呢條反而開咗個窿（而且個窿唔細），有啲擔心會唔會因此導致芯片容易受到干擾......

格式工廠IMG_1547.jpg

至於插頭端另一側，就刻有MEIZU HiFi Audio嘅字樣。

格式工廠IMG_20190516_174234.jpg

嚟到測試時間，今次就用HTC轉接線、Apple轉接線同埋Tempotec Sonata HD同魅族HiFi解碼耳放做對比測試。

首先用手機做測試，測試用嘅手機係堅果Pro2S，配合iBasso IT01s進行測試。
底噪（大至小）：Tempotec≥HTC>魅族>Apple
音量（大至小）：Tempotec>HTC≈魅族>Apple
推力（大至小）：Tempotec≈魅族>HTC>Apple
分析力（好至差）：魅族>Tempotec>Apple≈HTC
整體表現：魅族>Tempotec>Apple>HTC
喺手機上使用，魅族線分析力比其他三個好，唔止背景比較純淨，推力都唔細，出嚟啲聲都唔錯。

不過今次試埋將佢地插落用Windows 10嘅電腦用（新版Win10 support USB Audio），睇下會唔會有咩改變。
在此之前，首先要講一件幾重要嘅事，第一次將轉接線插落電腦嗰時，千其唔好貪方便戴住耳機插落去，佢插落去嗰一刻Windows會有提示音，但Tempotec、HTC同魅族第一次插落電腦嘅預設音量都係100（滿格），於是喺嗰一瞬間，唔好彩嘅你有可能失聰......我有先見之明，轉接線插落電腦之前先除低耳機，然後轉接線插落去電腦嗰一刻，我聽到放咗喺檯面嘅耳機傳來Windows 10嘅提示聲......僥倖逃過一劫。
試插Apple轉接線嗰時，望到預設音量係25（四分之一），一開始想讃Apple考慮周到，不過諗深一層，好似呢個就係佢用喺Android phone嗰度聽落比其他轉接線細聲嘅原因？
（睇返soomal對Apple Type C轉接線嘅測試報告，Apple線用喺Android phone嗰時輸出電平好低，所以唔止係細聲，實際上推力都好細）

駁落電腦用，真係有幾大變化。
魅族線原本喺手機用嗰時音量係大過Apple線，去到電腦就變成細聲過Apple線。
（上述及此處所講嘅音量，係指如果要做到耳仔聽落係同等音量，我需要將電腦上嘅音量調較到幾大）
但推力對比起用喺手機，四條線都係有所提升。
HTC線同Tempotec Sonata HD插落電腦之後，底噪水平都有改善。（但依然不及Apple線及魅族線）
結果就變成咁：
底噪（大至小）：Tempotec≈HTC>魅族≈Apple
音量（大至小）：Tempotec≈HTC>Apple＞魅族
推力（大至小）：魅族>Tempotec>HTC>Apple
分析力（好至差）：魅族>Tempotec>Apple≈HTC
整體表現：魅族>Tempotec>Apple≈HTC

雖然都有唔少改變，但魅族線嘅表現依然係全場最佳。啲聲最有氣有力，底噪水平又拍得住Apple線咁低，分析力都係好過其餘三個。
能夠做到大推力嘅同時，仲可以控制到底噪水平，可以睇得出魅族有誠意做好呢條轉接線。另外魅族HiFi解碼耳放嘅發熱量都幾大，聽幾首歌之後已經發現插頭端明顯發熱，仲熱過tempotec，難怪會用到金屬外殼。
不過咁，魅族叫呢條轉接線做“解碼耳放”始終都係過於自信。受到體積限制，魅族HiFi解碼耳放嘅推力仲未達到推得郁大耳牛嘅水平，推啲阻抗略高嘅入耳式耳機或者平頭耳塞就應該ok。
話雖如此，以佢169人仔嘅售價嚟講，呢條線相當抵玩，不過唔好期望佢拍得住大大部嘅真·解碼耳放咁囉。

0

0

dreail

中級會員

Rank: 2 Rank: 2

2^#

發表於 2019-5-18 04:30 | 只看該作者

support

TOP

makeedee

中級會員

Rank: 2 Rank: 2

3^#

發表於 2019-5-18 08:19 | 只看該作者

呢類線最大問題係係個手袋塞下塞下會壞
如果usb線部分改更換式就最好

山靈m0 可當藍牙夾式接收器,usb dac
fiio同7彩虹都好似有類近玩法

TOP

devilcat1

進階會員

Rank: 3 Rank: 3 Rank: 3

4^#

發表於 2019-5-18 08:25 | 只看該作者

呢條線就係耳放本體?

TOP

hk133

進階會員

Rank: 3 Rank: 3 Rank: 3

5^#

發表於 2019-5-18 11:51 | 只看該作者

回覆 3# makeedee

如果整成可換線式，一定唔會咁細條……
至於藍牙，暫時都冇辦法做到玩game嗰時聲畫完全同步。（尤其係音樂類遊戲，雖然音樂可以做到近乎零延遲，但打中嘅sound effect依然會有延遲）
呢種線玩game嗰時用得著，偷懶唔想帶多部DAP出街/去旅行嗰時都用得著，跌咗/整唔見咗都冇咁肉赤。

TOP

hk133