[教學] 性價比高？一波多折的Notebook維修記3

niyaniya

其他帖子導覽：
[教學]第一次拯救iPhone大戰
https://goo.gl/e1VRnZ
[教學]第二次拯救iPhone大戰(入水6s)
https://goo.gl/j02f2H
[教學]碾碎iPad 2大翻身
https://goo.gl/U23ZuE
[研究]Notebook維修記
https://goo.gl/gkKnT6
[教學]Notebook維修記2
https://goo.gl/GSomBZ
[教學]PC保養 before after~(低成本)
https://goo.gl/4o7PGB
[開箱]平靚正淘寶機箱簡易開箱兼DIY防塵(究極級防塵？)
https://goo.gl/NJu4pn
[教學]舊機翻生X翻新X死因庭
https://goo.gl/yTkkbD
[教學]性價比高？一波多折的Notebook維修記3
http://tiny.cc/1ihkdz

曾經，我在Whatsapp群裡向同學們介紹了各一部自以為性價比唔錯嘅Dell和HP機，點知隨即有識電腦嘅同學很不屑地拋下了一句說話：
「兩部垃圾機」
雖然感覺好打臉好唔畀面，但我仍然感到好奇問道：「點樣先算唔係垃圾機？」
佢回覆話：「Acer機的性價比幾高」

以前我係睇唔上眼Acer嘅，但經佢一講，查咗資料後發現性價比的確幾高。於是從此就介紹咗好多朋友買Acer機，多到深水埗某間電腦店嘅Sales都認得我了，然後大家從此開開心心地用著Acer機過著幸福快樂的生活，The End～

No no, 故事仲未完，所謂上得山多終於虎，結果就有部Acer F5-573G(i5-7200U GTX950M)出咗事了，但好彩仍在保養期內，我就冇接過手睇係乜嘢事，搵咗地址叫朋友直接拿去官方售後處理。
但非常唔好彩，官方售後回覆話係讀卡器短路導致燒主板，係人為損壞，所以唔保，維修的話價錢係$5800。

部機我同佢去深水埗買咗$5600蚊，保養期內維修居然要$5800。

但我一直唔得閒，最後介紹咗佢去深水埗我以前寫嘅「Notebook維修記」https://goo.gl/gkKnT6 嗰間整，話如果要換主板要$1500 HKD左右，但隔咗幾日話係燒CPU冇得整，要換板價錢又唔只$1500，幾多朋友冇講，但最後冇整到收返。

收返後我拿嚟睇過，發現少咗幾粒原裝螺絲，覺得嗰間店真係好粗心。維修記1時拿過去換粒貼片保險時畀個盒我裝螺絲最後都幫我整跌曬，然後隨便補幾粒畀我就算，今次又係咁，所以都幾失望。

死唔信邪，唔知會唔會係香港啲技術未够，反正死馬當活馬醫，於是幫佢拆咗HDD、RAM、同電池等再託人拿去內地寄淘寶整。等咗幾日，淘寶嗰邊都覆我係燒CPU，而且影埋相拍埋片係CPU有裂痕，真係冇得整。


朋友趕住要用機，又唔想花太多錢整，怕整完又會壞，所以就買咗新機了。今次我唔好意思推薦佢買邊部，佢最後買咗ASUS Vivobook X542U(i5-8250U)，6千幾蚊。


舊機放咗喺我度，隻1TB HDD幫佢拆咗，畀咗個2.5吋硬碟盒佢當External HDD用，部機話整唔返嘅話當送畀我，佢話ok。後來見到淘佬有塊i3無顯示卡主板，開價700蚊人民幣(未包運費)，馬上問朋友搏唔搏下，佢ok於是買咗返嚟，結果開到機但花畫面，退貨仲要我支付來回運費先畀退，話買咗運費險(冇喺內地銀行實名開戶根本退唔到畀我)。


心煩了，以前買過主板冇問題嗰間開價太高，i5 6代+獨立顯示卡要1700以上，i3內顯甚至都冇貨，因為嗰時7代機仲好新，二手板難搵。eBay都睇過，但要兩千幾，有問題退貨就運費都會好貴，朋友話想1000內，太貴就唔整了。

於是部機就咁放咗喺我屋企成年，然後最近見ebay有塊E5-575G板賣，主板型號一樣，而且同樣係i5-7200U GTX950M，$118.99 USD，另外運費$28.59 USD，total大約1200左右，間店好評幾多下，而且計埋運費都比淘佬平，於是又勸誘咗朋友去搏




但真係衰開有條路，收貨後發現其他功能正常，開機檢測電池正常，但就係用電池開唔到機。經驗唔够，並先從小問題開始懷疑，用萬用錶check到電池只有0.2V輸出以為唔正常(其實好正常)，覺得可能係電池太耐冇充電所以壞咗，於是同朋友傾完淘咗粒電池返嚟試，但結果一樣。

上方淘佬電，下方原裝電，只係電容量唔一樣～

eBay退貨郵費太貴，而且塊板算係唔錯，加上最近喺淘佬搵到間信得過嘅維修店，小問題有意寄去整下算。當然eBay嗰邊都同步用緊痞腳英語匯報一下，睇下有冇可能拿到少少退款做補償。

電池、硬碟盒、佢另一部舊notebook嘅keyboard同寄來寄去嘅郵費等款項加加埋埋越嚟越高，未計維修成本已經要14xx了(之前話整唔返當送畀我所以一直冇計，宜家整得返當然計返，幫朋友整機一向唔收人工，但亦唔會蝕本整)。但朋友屋企人見越整越貴，可能覺得我信唔過，話最多只限$1500HKD，再多就唔整。結果真係有少少checkmate了...2千幾蚊唔使買到部7代Laptop的話係值嘅，但好多人都唔中意花太多錢整機，覺得會再壞。冇辦法，咁就照之前講好咁當送畀我，所有成本我出吧。


點知後來情況戲劇性到你唔信，嗰個星期嘅星期五，eBay嗰邊賣家覆我話全數退返曬錢畀我，而且塊板無需退回。真係令人意外得很，我嗰時晚晚OT，根本連圖片同Video都唔得閒拍嚟證明，只係幾次簡短文字回覆，諗住星期六先拍片證明。估唔到嗰位賣家居然咁豪爽，連郵費全數退回，就只係蝕咗幾十蚊喺匯率問題上。


不過，遇到好人好事我仍然會反思，千幾蚊對於我哋人生算不上多少錢，咁樣算唔算損人利己？所以我就按照原定計劃咁拍咗條片畀eBay賣家睇，開機check到電池正常有66%， 但一拔電源插頭部機就會馬上熄(人哋就算信得過我我都仍希望努力令人更放心去相信)。另外又建議咗朋友從嗰畢退款上扣除維修費、電池錢，再拿$150HKD當做問題主板嘅補償，其餘我哋整完後再退返畀賣家，朋友話我揸主意就好。

整完部機連來回運費用咗277HKD，於是可以退返$589港幣畀eBay賣家，大約$72USD。很努力地用自己的痞腳英語連絡咗幾次，又提議開個類似價錢嘅物件我拍下唔洗送嚟當退款，但賣家似乎唔太想收返，好客氣咁叫我無需擔心，唔需要退返畀佢。






原來都係拍咗片人哋先知我噏乜，之前都唔明白就已退款？

再講就係我煩人了，於是我就唔再婆媽，只好將錢回饋返畀朋友。

朋友最後只需畀返咁多我：


如非有哩畢退款，朋友要出咁多：


結果係主板嘅充電循環出咗問題，請留意右手邊插電位，整完後冇插電都開得返：


題外話：外置盒原來朋友一直冇用過，嗰時硬碟連架拆畀佢，佢唔識裝又冇問我，於是一直冇用過，交收請我食飯時問我點用我都傻咗眼，最後幫佢裝返硬碟並退返外置盒錢畀佢

今次係我第一次用eBay買嘢，以前覺得山高皇帝遠，出咗事退貨費太貴，所以幫人換板都首選淘佬，但賣家哩個舉動真係令我對eBay信心大增。做生意係賺人心，佢已經賺得我心了，以後只要有需要，貴少少都願意搵佢買。

至於邊間嘛，唔太方便講，雖然想宣傳一下，但又怕有人混水摸魚，搞到金斧頭銀斧頭嗰種事發生。故事裡還有神可判斷真假，但現實中哩啲人只會搞到老實人唔再願意相信人...但最少，我要將哩種好人好事講出嚟～

回歸主題，性價比高嗎？形同虛設的售後，成本原來就慳咗喺哩度，唔壞的話的確係性價比高，但買部機要人求神拜佛唔好壞嗎？正常插讀卡器燒咗可以當人為短路？定只係一出事賴人為？好吧，哩啲無頭公案唔深究，但對比之前「Notebook維修記」裡面人家Sony短路燒都只係燒粒貼片保險，你Acer就直接爆CPU？算唔算設計不良？保修期內換主板要$5800？咁同有壞叫人直接買嗰部有乜分別？

louis3412

點樣先可以壓爆粒die

via HKEPC Reader for Android

cwcc

師兄真係好心機亦都夠朋友

via HKEPC IR Pro 3.6.1 - iOS(3.0.0)

clownfish

買notebook講彩數

lolololl

回復 2 #louis3412

未試過壓爆粒u

niyaniya

點樣先可以壓爆粒die

via HKEPC Reader for Android
louis3412 發表於 2019-9-28 16:53

唔係壓爆，官方話係讀卡器短路燒嘅

觀星是答案

其實香港維修費, 人工本身已經好貴
件 parts 如果無 warranty 既情況下換 , 件野間廠無乜存貨的話一樣會開好貴

以前用 IBM ThinkPad (仲未係 lenovo) , 佢一條 LCD cable (真係機連住 LCD 個條電線 only)
開個價夠我買 3 台同系列既最新 model

觀星是答案

回復 觀星是答案

吹大d啦,我上次要成30台呀

via HKEPC Reader for Android
xiuying 發表於 2019-9-28 18:57

你唔信我都無計啦 ~ 可惜十幾年前既單已經無晒