本帖最後由 絕對好奇 於 2015-6-5 09:21 編輯
前言：
雖然小弟買咗部閃豬，但係有時想維修或者整啲大件嘢嘅時侯，
就覺得部機可印面積太細而印唔到，成日心思思想改大佢，
但係又考慮到個ReplicatorG程式有時個模型太大件會gen唔到code,
咁樣改大咗部機都無用，不過係版區又睇到其他師兄話，
MakerWare程式可以gen到大件嘅模型，於是就試下用下啦，
係就係得嘅，不過用佢嘅預設模式印出嚟嘅尺寸唔準，如果想尺寸準確，
咁樣又要摸索過佢嘅tune機模式,我一諗起tune機嘅痛苦！所以遲遲都唔想攪！
但係最近個垃圾桶用嚟壓住垃圾袋嘅內框斷咗，於是又俾到啲動力我，
去研究下隻MakerWare，經過一番努力之後終於都有啲成果，
但係攪掂完一樣又有另一個問題要解決，就係改大部機嘅laser cut圖,
由於小弟唔識劃laser cut圖,於是用咗網上人哋將Replicator，
改高咗嘅圖嚟用http://www.thingiverse.com/thing:33265。
但係佢只係改高而我想要嘅係改高兼改濶，於是自己裝個AutoCAD試下，
由於小弟未學過又懶，先開咗幅圖出嚟睇下點攪先，點知俾我攪攪下，
又好似攪掂咗，不過唔知自已改嘅圖work唔work,咁就開個post問下啲師兄先，
多得bunbunlui師兄熱心相助， 幅laser cut圖終於完成。
就係我諗緊點樣上淘寶攪laser cut啲嘢嘅時侯，突然聽到丁咚！丁咚！嘅聲，
嘩！原來有位2004年註冊嘅古董級深水沈底萬年潛水艇嘅會員pm小弟,
話可以幫忙我做亞加力膠 Laser cut 只要買返材料俾佢就得嘞,
小弟當然立即ler飯應， 嗰位師兄仲同我重check過啲圖，
確認無問題就去馬，點知中途遇到啲意外，嗰位師兄同部 Laser cut機，
搏鬥咗六、七個小時，犧牲咗半日時間，終於都攪掂咗！我當時要開工，
叫咗朋友幫我去攞，我從朋友手中接過呢份禮物，一打開，
嘩！正嘢！大大盒Puzzle！Puzzle！
不過隻大豬個殼有啲先天缺憾，因為超哥部Laser機size有限，
前後面板太濶介唔到，要分開二段嚟介，加上小弟對亞加力膠無認識，
結果上螺絲嘅時侯上爆咗好多螺絲位！
唯有動用緊急方案將隻豬重重圍困，實行五花大綁！
第一章：事前準備
攪掂咗個殼即刻上淘寶買料訂貨，將我諗到需要用到嘅嘢一次過買哂，
<由左上至右下>
150mm耐高溫膠帶，環形熱電偶K型熱電偶 ,K型熱電偶，12V/24V 40W標准加熱管,
0.3，0.4，0.5mm黃銅噴嘴，MK8加熱塊加熱頭，雙噴頭喉管固定塊 ，加熱喉管，
10米S2M 6mm 同步帶,U型槽軸承，送料輪，M3內六角固定螺絲 。
注意：1.環形熱電偶K型熱電偶呢隻唔好買，經小弟試用環形同電線個接駁位好易斷！
2.已買閃豬嘅師兄只需買五米S2M 6mm 同步帶就可以，其他材料係小弟自已買嚟備用。
(一米長)10mm、8mm及5mm光軸
注意：1.已買閃豬嘅師兄不需要買5mm光軸
2.10mm及8mm光軸只需要各買兩支
400mm滾珠絲杆，梅花聯軸器，42 二相四線步進電機，法蘭bearing，
MK3 雙電源 BUEBot 發熱板、heatbed鋁板、保溫木板、 彈簧 、高硼矽玻璃板加貼膜，
10mm及8mm直線bearing。(8mm直線bearing同閃豬長度不同)
注意：已買閃豬嘅師兄只需要買一支1204嘅400mm滾珠絲杆，
一個梅花聯軸器，８個10mm及４個8mm直線bearing。
問咗個friend借咗cut機用嚟鋸光軸！
注意：cut機係一種非常危險嘅切割工具，如果無DIY經驗嘅巴打，
小弟強烈建議唔好試用！點危險法？只要你開咗個power,
自然會感覺到佢係一把大殺傷力嘅武器！
啲貨到咗手，小弟即刻驗查下啲光軸直唔直，將支光軸放係玻璃或木板上面滾動，
1.睇下條光軸係滾動期間有無晃動，如果無嘅話就代表佢夠直。
2.聽下佢滾動嘅聲，如果啲聲比較細及一致就代表佢夠直。
我買咗兩條8mm同5mm嘅光軸，經過上述測試，全軍盡墨，無一條係完全直，
全部都有小小彎，不過用落又好似無乜大問題，但運作時比較嘈！
另外四條10mm光軸,三條pass,一條肥佬，總算有啲安慰，買多咗都值得！
測試完光軸及檢查過其他零件後，開始擬定計劃，我嘅計劃如下：
1.先將閃豬嘅零件移植到大豬身上，再測試佢移植後運作是否良好，
目的係睇下大豬個殼有無問題，無問題就再換上加長咗嘅8mm光軸。
2.如果計劃1無問題再自行設計或改圖俾10mm光軸嘅膠件及打印，
膠件印完將8mm光軸拆下再換上10mm光軸。
計劃大致係咁，細節會係文章裡面再講。
第二章：移植
本來諗住係拆機之前先印好啲加長版嘅Z及Y軸嘅膠件，用以安裝原版短咗嘅光軸，
但係加長版嘅光軸已經鋸好及安咗上大豬個殼上面，
小弟貪懶，一於跳過呢個步驟,直接用加長咗嘅光軸就算！
不過都要拆咗細豬啲零件先，
先拆噴頭及兩邊同步帶，
再拆埋兩邊固定Y軸光軸嘅膠件同埋將兩條光軸抽出嚟，成嗰Y軸及X軸組件就可以拆咗落嚟。
Y軸嘅步進馬達：先鬆螺絲再鬆同步帶，就可以順利拆下，
前後兩條同步5mm光軸：先鬆開同步輪上面兩粒螺絲.將零件向中心移動，就可以拆佢落嚟，
heatbed：呢度小弟失策！事後檢討，應該先鬆開電源插座，再升起heatbed到頂，
拆咗下面固定Z步進馬達四口螺絲，將步進馬達向下移，
旋轉絲杆直至heatbed與絲杆分離，拆咗兩邊光軸頂上面嘅固定膠件，
將兩邊光軸抽出，咁就可以成個heatbed拆落嚟，唔洗花咁多功夫嘞！
不過相己影，post 出嚟睇下佢嘅結構都好嘅！
只要將以上程序逆向安裝係大豬身上，咁就好易攪掂！跟住就係輪到移植火牛同電子零件部份，
不過係呢部份，小弟就遇到重大問題嘞！！！！！！！
呢個問題要追溯返係thingiverse個Replicator嘅Laser cut圖，
雖然小弟睇到佢個前面面扳同閃豬唔同，
我亦都因應而作出修改，但係因為量度尺寸嘅時侯無拆個keypad出嚟度，度得唔夠準，
所以裝嘅時侯唔啱位，而且就算啱位都無用，因為入sd卡個位已經俾加固膠件封咗！
而其他如mightyboard，火牛同電源插座啲位全部都唔啱，呢鑊真係濕滯嘞！
只怪自己心急，又唔識睇Last cut 圖，又無見過Replicator嘅真身，以為閃豬係Replicator嘅兼容機，
啲零件同位置應該會啱位，呢次真係衰天真兼夾儍嘞！ 
係茫然不知所措嘅時侯，我諗諗下之前入sd卡成曰對唔準位，試過幾乎插爛張卡，
加上部機依家靠右邊牆放，已經無位俾隻手入去插卡，經過反覆思量之後，一於將錯就錯，
重新安排過啲位置，將火牛向右放，mightyboard向左放，唔要電源插座,直接用電腦火牛延長線直駁火牛，
但係隻牛啲螺絲位唔啱，點樣安上去大豬上面呢？諗咗一陣，決定用最原始嘅方法覆印上去：
用A4貼紙貼落隻火牛上面，為防黐得大實，先用小弟隻咸豬手摸下張貼紙,等啲汗同手油黐落貼紙上面，
等佢減低黐力，再係螺絲窿位上用筆拮穿佢，用較剪修邊剪成火牛嘅平面貼紙，
將貼紙因應位置黐落大豬個底上面，跟返啲螺絲窿位置鑽窿，最後上埋隻火牛上去，攪掂！
而mightyboard就用一塊亞加力膠片托住再安上大豬嘅左邊底部，
係安裝之前順手將reset掣加條延長線，以方便曰後係前面按掣，
而之後會係mightyboard塊亞加力膠片上，加裝一把24v渦輪扇以作散熱。
不過有啲線會唔夠長，要自已駁返長先夠用，裝埋endstop同Lcd display而keypad就暫時裸跑住先，
萬事俱備,接上電源,等我home一home佢先,睇住X,Y軸歸零,而Z軸heatbed緩緩上升之際，
突然一件意想不到嘅事，就咁係我眼前發生咗嘞！
阿細豬佢竟然生得唔夠高....................，個heatbed升到盡都唔掂唔到個endstop！
呢鑊真係估你唔到啦！
仲諗住攪咗咁多嘢可以試機添，真係一盤冷水照頭淋，當堂謝哂！
唉.............傷心之餘又要食返口事後煙！可怒也！ 一於同細豬做外科手術，
將佢由矮東瓜變成高腳七，同時做埋headbed加大手術，令佢由細豬變成中豬至得！
手術過程如下：
1.用210x210mm發熱pcb改造
係呢度，小弟承認貪慕虛名，因為成日見到同學會啲師兄用呢塊大size嘅發熱pcb，
相比細豬嗰塊大咗一截，但係我忽略咗呢塊同細豬嗰塊嘅火數原來一樣，
大家都係24v 250w，唉！我仲買咗兩塊添，真係失策！失策！
不過唔買都買咗，無埋由唔用，睇真啲原來佢嘅線路同細豬嗰塊唔同，
細豬有6條線，而佢只有四條線，好彩有朋友幫忙至攪得掂！
電子嘢小弟唔係好掂，如果有師兄有興趣想知嘅話，揾日我再問清楚佢，
先講headbed改造過程：
a.先將細豬嘅鋁板同pcb分離，
b.將鋁板或pcb放係headbed嘅原本位置，
c.再係上面加一塊210mmx210mm嘅鋁扳，並在邊緣位置作出標記，籃色框係透明膠紙
d.移除細豬嘅鋁板或pcb，<因為鋁板同下面木板有一段距離，用普通嘅筆太大穿唔到落木板到做記號>
再係210mmx210mm鋁扳中心四個窿位置，用2mm鑽咀插入並用手鑽至下面木扳鑽出微小痕跡，
移除鋁板，係剛才留低嘅微小痕跡上面用筆加大記號，再用3mm鑽咀鑽穿，
e.用四條30mm長嘅膠管，放係鋁板同木板之間，才用螺絲穿過及用絲帽固定以完成底部部份，
f.將保溫木板裁出發熱板電源接口位置及四邊角位螺絲窿，
g.用擴孔器將另一塊210mmx210mm嘅鋁扳螺絲窿位邊緣加大加深，
以便藏入3mm平頭螺絲頭，
h.再將保溫木板，發熱pcb，210mmx210mm嘅鋁扳，順序鋪上，
i.用3x30mm長螺絲穿過及用絲帽上實，
j.穿上彈弓後再穿過底下210mmx210mm嘅鋁扳，再加上絲帽及調節旋紐便可完成！
注意：210mmx210mm鋁扳，分別係上同下一共兩塊。
2.用細豬原裝發熱pcb改造
同1.嘅做法大致相同只係由大嘅發熱pcb改成細豬嘅發熱pcb
<注意>：呢個方法小弟雖然係無做過，不過應該行得通，
而且可以免卻改發熱pcb嘅線路同慳返買大size發熱pcb嘅錢。
做完手術之後就準備做home offset較準嘞！
第三章：蛻變
同閃豬做完手術，佢就由可打印(225x145x150mm)嘅細豬，
變成可打印(210x210x180mm)嘅中豬嘞！(但係長度蝕咗15mm)
不過只係表面係中豬，佢內心仍然係一隻細豬，
唔做調較，佢只會印返原本嘅尺寸,所以要修改ReplicatorG 嘅 driver同home offset較準，
方法如下：
A:修改ReplicatorG driver
要改尺寸就需要修改replicator.xml或Creator.xml檔案，令到ReplicatorG程式知道新嘅可打印面積，
呢個file係ReplicatorG入面嘅machines目錄裡面可以揾到，小弟己經由Creator嘅driver，
轉咗做replicator好耐，轉嘅原因係佢哋係ReplicatorG程式入面，開Contorl panel時畫面唔同，
Creator driver
replicator driver
我比較喜replicator嘅畫面同操作，其實兩個檔案除咗參數唔同，基本係一樣，
想由Creator轉做replicator，最簡單嘅方法就係刪除replicator.xml，
將Creator.xml改名做replicator.xml咁就可似，仲唔洗將啲參數搬來搬去添，
依家要講下改打印面積時，需要修改嘅參數，先用記事簿打開replicator.xml檔案，
由於我係單頭機，所以係<name>The Replicator Single</name>以下嘅參數做修改，
上圖藍圈為需要修改嘅參數
上圖紅圈為己修改嘅參數，修改完打開部機嘅電源，用usb連接電腦，
再開啟ReplicatorG程式，數值就會傳送到部機到，
而ReplicatorG程式嘅圖示就會由下圖長立方體，
變成稍為近似正立方體，見到呢個畫面就表示修改成功！
而下圖藍色圈住嘅The Replicator Single，
其實可以修改成自己鍾意嘅名，小弟就係度示範同惡攪一下先。 
B:home offset較準
調較home offset呢部份前，要較好heatbed水平先，咁就可以邊印邊試嘞！
01.先劃一個200x200mm嘅直升機坪嘅圖，
02.係heatbed上面劃兩條對角線，以找出中心位置，
03.將部機嘅電源打開，用usb連接電腦， 用部機嘅Home Axes功能，
將X,Y,Z歸位回到Endstop位置，係電腦打開ReplicatorG程式
係Machine下拉式窗口，點選control panel，如下圖
04.按下圖中左邊嘅X及Y,令部機嘅噴頭移至中間，直至噴嘴到達中心點，
此時將右邊X,Y嘅數值記下，以作下一步用途，關閉control panel視窗，
05.係Machine下拉式窗口，點選Onboard Preferences，如下圖
06.係下面清單點選Homing/VREFs，將剛才記下嘅X,Y數值分別填入，
X home offset(mm)及Y home offset(mm)欄內，
07.載入直升機坪圖嘅stl file及打印,打印之後睇下位置是否正確，
如果有偏移就係X home offset(mm)及Y home offset(mm)欄內改變參數，
修改參數以下面為原則：
X+=向右偏移 X-=向左偏移,Y+=向前偏移 Y-=向後偏移
每次修改以mm計算，例如依家嘅X數值為100,要佢向左偏移10mm，
咁就要係X home offset(mm)欄內改為(100-10)=90。
修改完按Commit Changes按鈕以完成操作。
C:修改start.gcode及end.gcode
修改start.gcode檔案嘅目的，係話俾部機聽X，Y軸嘅等待位置，
以便等待headbed同噴頭加熱，由於我用自訂Profile及start/end.gcode，
無研究預設嗰個放係邊個位置，所以只可以用自訂Profile做說明，
01.先打開ReplicatorG程式，按頂上嘅GCode鍵，再按Edit Slicing Profiles.
02.點選一個要修改嘅profile，再按Locate.. 鍵，就會彈出檔案視窗，
03.進入alterations目錄就會見到，用wordpad先打閞end.gcode檔案，
04.將G0 Z150改為G0 Z180，修改完保存檔案，再打閞start.gcode檔案
05.將下圖上面紅色方格呢兩行嘅X-110.5 Y-74，修改成Onboard Preferences嘅數值各減去1或2，
記得保留減號(-)，即X-(修改數值),而Z150呢個參數，就改成Z180，
下面紅色方格呢兩行嘅X-110.5 Y-74，修改成Onboard Preferences嘅數值，修改完再保存檔案，
06.先打開ReplicatorG程式及按Generate GCode鍵，係第一行揀選剛才修改嘅profile，
Untick咗Use default start/end.gcode個方格，按Generate GCode鍵開始Gen Code，
07.連接部機打印模型，睇下X,Y,Z軸嘅位置理唔理想, 因應情況再作偏移調校，
偏移調校與調校Onboard Preferences相同。
完成以上三個步驟，中豬嘅改造已經完成，但係我發覺佢仲有好多空間可以利用，
於是用咗一塊已經唔用嘅鋁板mouse pad，修改及代替咗heatbed塊210x210mm嘅鋁板
令到佢嘅可打印體積變成270x220x180mm咁大，仲試印咗條heatbed arm添！
效果小弟就非常滿意，只需要兩條加長嘅8mmY光軸及兩條加長嘅8mmZ光軸，兩塊210x210mm鋁板，
兩條加長嘅同步帶，加埋laser cut木板或亞加力膠，成本有限剩係花啲時間同心思就可完成，諗得過架！
另外小弟之前唔推薦用亞加力膠，但係砌好之後我又改變主意，因為我發覺亞加力膠比較厚實，
唔會好似木板產生共鳴，運作嘅時侯係靜好多架！完成8mm改造，小弟又要向10mm出發嘞！
第四章：百練成大豬
A.簡介：
相信各位睇到呢一章個名就知道有幾甘嘞！ 不過最甘係改進啲膠件設計，
都唔知改過幾多次設計同試印過幾多次，試印到我啲橙色膠都用哂，
不過呢一part 我唔詳細講嘞，呢部份主要講點樣安裝滾珠絲杆，
stepper，stepspermm嘅問題，同點樣修改MakerWare嘅設定。
B.逸事
小弟未買3D Printer之前，對呢一瓣嘅軟硬件毫無認識，
3D Printer嘅知識都係睇呢版啲師兄post，同我個friend講咗啲相關嘅嘢，
加上自已做筆錄同研究，先對佢有多少少認識，所以當我係淘寶買梅花聯軸器時，
個老闆問我：你兩頭多大？我即時抓哂頭，
我心諗我上面個頭就正正常常唔係好大，至於下面嗰個囉喎！
係靚女見過都知佢花名叫大頭仔！唔知咁樣有幾大呢！
咳！咳！言歸正轉，我同個老闆再溝通咗一陣之後，我始終都唔知佢問乜，
終於都要向同學會啲師兄嗌救命，經同學會師兄解釋，原來佢係問我個聯軸器，
兩邊接頭位嘅圓周直徑有幾大，嘩！乜個老闆講嘢簡化到咁架 ！
如果無同學會師兄幫手，我都唔知點算！
另外gorto大佬話佢試過買咗支滾蛋絲杆，出嚟嘅效果重衰過普通絲杆，
攪到我當堂窒咗一窒，唯有講笑咁講，如果我買嗰支又係滾蛋絲杆，
一於霎熟支絲杆同叫個滾蛋老闆嘞！
C.安裝滾珠絲杆
安裝滾珠絲杆需要一個聯軸器，將支絲杆同stepper連接，
由於個stepper支軸太長，所以要用cut機鋸短，
而支滾珠絲杆亦係太長，一樣需要cut短，
收緊聯軸器啲螺絲，支絲杆同stepper嘅連接完成！
小弟一時貪心買咗支400mm咁長嘅滾珠絲杆，因為佢只係比300mm貴20蚊人仔，
諗住啱啱好,點知原來未計埋個聯軸器嘅長度，同埋會cake住上面支5mm同步光鈾，
結果長過頭，要係啲螺紋位再鋸短啲，我一睇就知呢次惡攪嘞！
唯有小心翼翼地慢慢鋸，點知鋸鋸下...................................嘩！
成把cut機彈起咗，嚇到當堂標冷汗，幾驚佢爆碟或者刮到其他嘢！
其實小弟都係第一次用cut機，而且睇得DIY版多，都知佢好危險！
係彈咗兩三次之後，終於都鋸好咗！
攪掂支滾珠絲杆就輪到整heatbed平台，由於原配件嘅heatbed arm係用8mm光軸，
要用10mm就要自己改，改好圖同印咗出嚟就試下安裝，點知改咗10mm嘅arm，
太粗壯唔夠位裝會頂到後面，於是修改光軸固定光軸嘅配件，令光軸向前移2.5mm，
雖然改咗可以裝到，但係支滾珠絲杆亦會向前移，要改埋headbed塊板嘅螺絲窿位，
由於唔想改塊原裝板，於是自行劃圖順便將個螺絲窿位向前移2.5mm及打印，
點知試來試去，支滾珠絲杆都係企得唔夠直，可能支heatbed arm改過，
令到個螺絲窿已經唔同咗，由於空間好窄想度都唔知點度，攪咗好耐終得俾我諗到個方法嘞！
就係自然歸位法，我將headbed平板上面嘅滾珠絲杆螺絲窿位改為長方型，
用保險螺絲帽上緊致剛剛掂到塊板，令佢可以用小小力就可以移動，
將上面嘅Z軸endstop移除，用ReplicatorG嘅control功能，
將headbed向上下移動，直至目測到支滾珠絲杆企得夠直為止，
再上緊絲帽，將headbed向上移動，disable咗stepper電源，
用手輕力往下壓向headbed，見佢自然一直向下跌，咁樣就算成功！
不過事後檢討，應該將中間嘅螺絲窿位刪除，先用前後四粒螺絲同絲帽，
用以上方法做，等到絲杆順滑歸位後，再加熱4mm鑽咀從上插入中間兩個螺絲窿位，
以作鑽窿定位後再鑽穿，再加返螺絲及絲帽固定，咁樣應該更好，
不過依家用落無問題唔想再整過嘞！攪掂之後就要試機，又要home一home佢，
點知支headbed arm改大咗，歸位時個噴頭會撞到支headbed arm，
唯有將Y軸endstop向前移，咁打印體積嘅濶度又蝕咗10mm嘞！
係換Y軸嘅10mm光軸之前，當然要測試下支滾珠絲杆先，
當我想用ReplicatorG印個thin wall時，奇怪嘅事又發生咗嘞！
個heatbed stepper竟然腳軟升唔起，淨係識得係咁震，
最後要用手幫佢先得，初頭以為壞 stepper，換咗個士啤同Y軸原裝落去都唔得，
但係用control控制佢上落又好正常,最後發現係未set好電流值，
set電流值嘅步驟如下：
1.打開ReplicatorG程式,係Machine下拉式窗口，點選Onboard Preferences
係下面清單點選Homing/VREFs，將紅框嘅數字改成118
2.打開start.gcode，係下圖紅框呢一行加入Z127
加Z127呢一句係因為ReplicatorG預設Z軸嘅stepper嘅電流值為40，
但一般係淘寶買嘅stepper，需要電流值都比較大無咁低，
所以先至會腳震升唔起，但係set好電流值都重未完全攪掂，
時得時唔得，攪到我差啲要鋸咗個原裝絲杆連stepper嚟用，
但係佢始終係一條好絲杆，小弟真係唔捨得鋸，又驚買咗嗰條係滾蛋絲杆，
鋸咗返唔到轉頭，攪到進退維谷唔知點算好，不過無理由時得時唔得架，
檢查過啲線同接口都無問題，終於都俾我揾到原因同解決辦法！
就係ReplicatorG程式有bug ，當啱啱home完X,Y軸完全歸位時，
再印嘢個Z軸就會腳震無力，但係只要將X或Y軸推開少少，
部機就會正常打印，知道原因就易攪嘞！只要修改start.gcode檔案，
係反白嘅地方加上呢一行，個作用係叫部機將個X軸向左移10mm，
後面F500係控制速度，一定要加F500呢一句，唔加呢句會chock到個噴頭梗梗聲！
攪掂咗呢個問題，就要修改replicator.xml檔案嘅Z軸steps per mm參數，
stepspermm點計係呢版好多post都有說明,不過小弟啲數學麻麻哋，
所以鍾意用網上嘅計算機，我用開呢個因為佢係中文網頁唔會攪錯，
最啱我呢啲英文差又係新手嘅人用，http://www.makerlab.me/calc/index.html，
順便講解一下方便新手嘅師兄，
上圖第一行可以看圖識字，而我個stepper同stepstick就係呢個規格，
箭咀1呢個係輸入螺距嘅數值，兩個選項係二選一，
下面選項係已預設一般常用嘅標準選擇，上面係直接輸入數值，
由於我支滾珠絲杆型號係1204，而04嘅意思就係螺距4mm，
所以係上面嗰行直接輸入4後按enter，箭咀2就會輸出答案，
用WordPad打開replicator.xml檔案
將紅框嘅400改為800,打開部機嘅電源，用usb連接電腦，
再開啟ReplicatorG程式，數值就會傳送到部機到，咁就完成。
而MakerWare嘅參數修改如下：
1.進入program files->MakerBot->MakerWare->s3g->profiles，
2.用WordPad打印ReplicatorSingle.json檔案，
3.將之前係replicator.xml修改嘅數值寫入紅框位置，
相信各位都應該看圖識字，不用多說鳥！
4.呢一步係修改MakerWare嘅Onborad Preference，
打開部機嘅電源，用usb連接電腦，再開啟MakerWare程式，
點選MakerBots再選Onborad Preference，
5.係下圖紅框數值修改成同ReplicatorG嘅Onborad Preference數值
修改完按下面Write Changes按鈕以完成操作。
6.修改MakerWare嘅start.gcode同end.gcode檔案<呢個方法係針對自訂profile>
a.打開自訂profile係下圖紅框位置加入兩行，
位置隨意，檔名隨便，方便自己就得嘞！
b.打開user->thing->自訂profile，將裡面嘅start.gcode同end.gcode，
複製到剛才指定位置及改檔案名，再用wordpad打開start.gcode同end.gcode檔案，
跟住下圖紅框位置修改參數 ，看圖識字不多作解釋嘞！
下圖為start.gcode修改
下圖為end.gcode修改
注意1：由於大豬已完成一段時間，只係因為家母離世，
所以停咗一段時間，我記得好似如果已經修改過,
ReplicatorG嘅Onborad Preference數值，
就唔需要再改MakerBots嘅Onborad Preference，
不過恐防記錯，所以都post埋出嚟，以防萬一！
注意2：唔好將我嘅X,Y嘅steps per mm參數照抄，因為未必適合你部機，
至於點樣調較返啱自已部機嘅參數下文會講。
由於長度限制，下文搬咗去
http://www.hkepc.com/forum/viewt ... ;extra=#pid32889995
247樓繼續！
乜有長度限制架，我依家至知！
ps：多謝古董級深水沈底萬年潛水艇師兄：超哥幫忙！
沈底咁耐都肯上水義助小弟，小弟萬分感激，
我呢個砌機post亦係為你而開！ |
簡體版
訂閱頻道
訂閱電子報
發表於 2014-8-18 03:54
| 
嗰位師兄仲同我重check過啲圖，
一於同細豬做外科手術，
