look back 真係值得一睇⋯⋯除非你係想睇溫馨治癒短劇

本帖最後由 hk133 於 2024-10-25 17:08 編輯

本文有劇透

無劇透警告：呢部電影不適合情侶、小朋友觀看。
千萬不要因為前段嘅劇情而假設呢部係一部勵志電影，
最後，you may look back, but don't look back in anger.

「劇透警告」

。

。。

。。。

「劇透警告」

。

。。

。。。

「劇透警告」

。

。。

。。。

正篇開始：

如果要以一句話概括電影內容，就係：
用一個令人難以釋懷嘅虛構故事，嘗試讓人對真實發生嘅事件釋懷？

我事前未有詳細瞭解電影劇情、未觀看原作漫畫，
簡介同電影前半段極具欺騙性，我一路以為呢套應該係勵志電影，
冇諗到原來前半段劇情只係鋪墊，係令人更容易代入主角、感受到主角嘅感受，
乃至於主角突然留意到新聞告知佢好友就讀嘅大學遭遇精神失常人士襲擊，
於是馬上打電話嘗試聯絡好友，再到接到電話確認好友已經不幸離世嘅時候，
有一種「自己嘅好友突然離世」嘅感覺湧上心頭。

呢一刻，我覺得我第一次更深入地了解到親友遭遇突發事故不幸離世嘅人嘅感受，
喺事前無任何準備嘅情況下得知親友已經不在人世，第一時間其實好難有反應，
去到實際見到塊神主牌，先至意識到佢真係走咗、呢一切真係已經發生咗，
然後回憶慢慢浮現，回想起親友同自己講過自己嘅夢想、喜好，最近沈迷嘅事情等等，
呢啲生活嘅一點一滴，組成腦海裡生動嘅形象。你知道佢嘅為人、清楚佢嘅性格，開始想像到遇襲時佢大概有幾驚訝、幾害怕、幾痛苦⋯⋯然後呢啲感覺好似自己都能夠稍微感受到。

劇情中，用一段亦虛亦實嘅想像故事，主角藤野想像「假如當初冇帶京本離開房間」嘅故事，反映佢將京本遇害歸咎於自己，「要是我xxx」、「假如我能xxx」，雖然明知時間唔會倒流，但都不禁會想像呢啲可能性。

或許就好似藤野嘅想像一樣，假如當初冇帶京本走出房間，如果自己去咗參加空手道訓練，確實可能可以救到京本。
但係時間不能倒流，發生咗嘅事始終無法挽回，我哋終究要面對現實、繼續活下去。
更重要嘅係，我唔想藤野否定同京本嘅相遇、唔想佢認為佢哋日積月累嘅友誼「毫無意義」，
更加唔想被任何一個人、哪怕係自己，否定呢一切。
不幸嘅結局不會令兩人相遇後嘅經歷變得毫無意義，但如果連自己都否定兩人相遇嘅意義，一切就真係會變得失去意義。

結尾藤野選擇做返自己應該做嘅事，繼續完成自己嘅連載漫畫作品，
繼續完成好友未能實現嘅夢想，即使始終未有機會兩人合作繪畫連載漫畫、亦未能即時放下所有傷痛，都要繼續畫下去。

就算明知係虛構嘅故事，我都依然好希望能夠有個美滿嘅結局。
倒不如話正因為係虛構故事，我更希望有個美滿嘅結局，因為不美滿嘅結局現實都已經見得唔少。

從故事敘述嘅角度嚟睇，作者確實有將故事好好講完，劇情直到收尾都冇拖泥帶水。
但個人感情而言，始終唔係咁想睇到咁樣嘅結局，京本未能成為藤野嘅連載漫畫嘅助手，藤野承受著親友離去嘅傷痛繼續將漫畫畫下去，實在過於悲傷。帶著一股鬱悶嘅感覺離開戲院，非常難受。

--------

10/26 追記：

今日再睇返漫畫，一邊睇一邊諗返電影版嘅配音，一邊喊。

比起對施襲者嘅憤怒，藤本老師呢個故事更著重刻劃受害者親友嘅悲傷。

如果今日只係睇新聞，見到咁樣一單施襲案，除咗憤怒之外，其實好難有其他情緒，畢竟你唔熟悉受害者、唔清楚佢哋嘅經歷、唔了解佢哋嘅生活，你只會對一個痴線佬殺咗幾個無辜學生呢件事感到憤怒都係正常。

但 look back 就強迫讀者用「受害者摯友」嘅角度，睇住佢成長、慢慢走出自己嘅 comfort zone，佢靠自己嘅努力同毅力，考上自己心儀嘅大學，然後一切睇落好似逐漸向好嘅方向發展嘅時候，突然話俾你知，你摯友死咗，唔係死於天災、意外，而係死於人禍。

唔單只咁，佢仲要好仔細地同你講解返遇襲經過，等你清楚瞭解到你嘅摯友死得幾無辜（遇到精神失常嘅無差別殺人犯）、死之前幾痛苦（殺人犯對著遺體仍不停揮下武器）、幾無助（在校內休息期間遇襲，附近沒有其他學生），可謂「殺人誅心」。

呢個時候你會開始發現，對施襲者嘅憤怒好容易被悲傷嘅情緒掩蓋。因為你唔識施襲者，但係你好清楚受害者。比起嗰個陌生嘅痴線佬，你更多會諗起你不幸離世嘅摯友，首先諗到嘅會係「個天唔應該要佢遭遇呢啲事」、「仲有好多嘢未同佢一齊做」，之後就係「如果我當初 xxx，佢可能唔會 xxx，咁佢就唔會死」，最後就係一邊睇住媒體報導，一邊想像當時佢有幾痛苦同無助，越諗越傷心、越難受。

睇完 look back 之後，我能夠稍微明白到對於呢類型嘅遇害案件，受害者家屬望到案件嘅詳細報導會係咩心情。客觀嚟講，喺法治社會，既然冇得對施襲者動用私刑，只要佢受到法律制度內應有嘅懲罰就夠，遇害者家屬唔會想知、亦都冇興趣了解點解佢要襲擊其他人、有咩苦衷，作案經過呢啲就留返俾保安方面嘅公司用嚟檢視保安有咩需要改進嘅地方。對案件細節講得多，同揭受害者家屬內心嘅傷疤、喺佢哋嘅傷口灑鹽冇分別。講少幾句，唔好搵埋啲所謂「專家」喺媒體評論事件，唔止係對遇害者嘅尊重，亦係體諒返遇害者家屬嘅情緒。