賤物鬥窮人系列 5.21人仔超低價基礎級 USB-C 迷你電流電壓計測試

（如果以下圖片無法正常顯示，點擊圖片即可查看原圖）

搜索「typec数显转接头」，再善用「找同款」功能，偶爾會出現 5.21 人仔呢種超低價。
加上桃佬 app 之前送咗個「桃佬省錢卡」1 蚊有找開通 3 個月優惠俾我，用埋省錢卡 2 蚊紅包，3.21 人仔埋單，如下圖：

本來為咗測試唔同舖頭嘅同款產品有咩分別，而分開喺兩間店舖各落單 1 個，
見到發貨地一樣嘅時候，我就知道似乎係同一樣貨源，
結果收到貨就發現，真係一模一樣⋯⋯

包裝完全一樣，而且包裝背面甚至寫明一大堆不同店舖嘅品牌，全部都係用佢啲貨～

本來怕撈亂兩款，所以分別揀咗藍色同半透黑色。
各有各好睇嘅，而且呢種透明外殼+黑色電路板嘅組合真係百看不厭。

同維簡 CC1 比，呢個電流電壓計更袖珍，不過顯示螢幕就細好多，每次亦只可以顯示電壓/電流/功率其中一個數值。

背面都可以睇到電流電壓計裡面嘅電路板，裡面啲元器件都算排列得幾整齊。

雖然佢嘅測量精度係 +/- 0.1V/A，不過讀數基本上偏差不大，有一定參考價值。
係個功率顯示唔知咩事，會有 +/- 1W 左右嘅波動，即使實際上充電功率好穩定、冇乜波動，佢嘅功率顯示都係會亂跳⋯⋯
不過咁平就冇所謂啦，大不了自己計返 V*A=W 囉。